Պերճ Թյուրաբյան

Պերճ Թյուրաբյան
Ի ծնե անուն	Պերճ Թյուրաբյան
Ծնվել է	փետրվարի 7, 1950 (74 տարեկան); Եգիպտոս
Երկիր	ԽՍՀՄ և Հայաստան
Մասնագիտություն	բանասեր; թարգմանիչ; գրադարանագետ; երաժիշտ
Աշխատավայր	Երևանի պետական համալսարան
Կրթություն	Երևանի պետական համալսարան և ԵՊՀ հայ բանասիրության ֆակուլտետ
Կայք	bergeturabian.com

Պերճ Թյուրաբյան (փետրվարի 7, 1950(1950-02-07), Եգիպտոս), բանասեր, թարգմանիչ, գրադարանագետ, երաժիշտ։

Կենսագրություն[խմբագրել | խմբագրել կոդը]

Պերճ Թյուրաբյանը ծնվել է Եգիպտոսում 1950 թվականին։ Սովորել է Կահիրեի Մխիթարյան վարժարանում, ապա ֆրանսիական քոլեջում։ 1965 թվականին ներգաղթել է Հայաստան^[1]։ Սովորել է Երևանի պետական համալսարանի բանասիրական բաժնում։ ԵՊՀ-ում դասավանդել է ֆրանսերեն լեզու և գրականություն։ 1960-ական թվականներին Թյուրաբյանը Հայաստանում սկիզբ առած հեղինակային երգի ներկայացուցիչներից էր։ 1987 թվականին աշխատել է Նյու Յորքի Կոլումբիայի համալսարանի գրադարանում, որտեղ շարունակել է ուսումը և ստացել է գրադարանագիտության մագիստրոսի կոչում։ Այնուհետև աշխատանքի է անցել Նյու Յորքի Հանրային գրադարանում։

Հեղինակային համերգներ է ունեցել Երևանում, Միացյալ Նահանգների, Կանադայի մի շարք քաղաքներում և Փարիզում։

Ֆրանսերենից հայերեն է թարգմանել Շառլ Ազնավուրի երգերը^[2]։ 2010 թվականին Երևանում լույս է տեսել «Ազնավուրը՝ հայերեն» ձայներիզը, որի մեջ ընդգրկված են Շառլ Ազնավուրի 13 երգերի հայերեն տարբերակները^[3]։ Թարգմանել ու կատարել է հայտնի ֆրանսիացի շանսոնյեների՝ Ժակ Բրելի, Լեո Ֆերեի, Ժորժ Բրասենսի ու Շառլ Ազնավուրի երգերը։