Շառլ Ազնավուր

Շառլ Ազնավուր Charles Aznavour
Շառլ Ազնավուրը
Հիմնական տվյալներ
Ի ծնե անուն	Շահնուր Վաղինակ Ազնավուրյան Shahnour Vaghenag Aznavourian
Ծնված	մայիսի 22, 1924 (1924-05-22) Փարիզ, Ֆրանսիա
Ժանրեր	Պոպ Շանսոն Ջազ
Մասնագիտություն	Երգիչ-երգահան, դերասան, հասարակական գործիչ, դիվանագետ
Գործունեություն	1936–ներկա
Լեյբլ	EMI MusArm Records
Կապված	Կլոդ Լոմբարդ Կատյա Ազնավուր
Կայք	http://www.charlesaznavour-lesite.fr/

Շառլ Ազնավուրը (իսկական անունը` Շահնուր Վաղինակ Ազնավուրյան, ծնվ. 1924 մայիս 22 – Փարիզ), նշանավոր ֆրանսահայ շանսոնիե, երգիչ, երգահան, կինոդերասան և հասարակական գործիչ։ 2009-ի մայիսից Շվեյցարիայում Հայաստանի դեսպանն է և Ժնևի ՄԱԿ-ի գրասենյակում և այլ միջազգային կազմակերպություններում Հայաստանի մշտական ներկայացուցիչ:

Կենսագրություն

Շառլ Ազնավուրը ծնվել է 1924 թ. մայիսի 22-ին, Փարիզում, հայ գաղթականներ Միքայել և Քնար Ազնավուրյանների ընտանիքում։ Մանուկ հասակում տարվել է թատրոնով, իսկ 1940-ական թթ. Պիեռ Ռոշի հետ հանդես է եկել կաբարեում։ Առաջին երգը՝ «Ես հարբած եմ» (1944), Ժորժ Ուլմյերի կատարմամբ, արժանացել է «Տարվա ձայնապնակ» մրցանակին, սակայն Ազնավուր-կատարողին հանդիսատեսը երկար ժամանակ չի ընդունել։ Համաշխարհային հռչակ է ստացել 1956-ին, Փարիզի «Օլիմպիա» դահլիճում հաջող ելույթից հետո։ «Ֆրանսիան ազնավուրացված է»,- գրել է ֆրանսիական մամուլը։ Շուրջ ութ հարյուր երգի հեղինակ է /մի մասը՝ երգահան Ժորժ Կառվարենցի հեղինակցությամբ/, այդ թվում՝ բազմաթիվ միջազգային հիթերի՝ «Մաման», «Բոհեմը», «Դեռ երեկ», «Երիտասարդություն», «Պետք է գիտնալ», «Նա», «Երկու կիթառ», «Ինչպես ասում են», «Հավերժական սեր», «Ավե Մարիա» և այլն։ Դրանց կատարողներից են՝ Էդիտ Պիաֆը, Լայզա Մինելին, Մստիսլավ Ռոստրոպովիչը, Պլաչիդո Դոմինգոն, Հուլիո Իգլեսիասը, Շերը, Ջո Դասենը, Ռեյ Չարլզը և այլք։ Ցայսօր վաճառվել է Ազնավուրի շուրջ հարյուր միլիոն ձայնապնակ։ Ամերիկյան «Թայմ» հանդեսի հարցման համաձայն Ազնավուրը ճանաչվել է «Դարի արվեստագետ»՝ 149 հազար ձայնով։ Արժանացել է Հայաստանի և Ֆրանսիայի բարձրագույն պետական պարգևներին, «Պատվո սեզարի» (1997)։ Նկարահանվում է կինոյում՝ «Գլուխը պատին» (1958), «Կրակեք դաշնակահարի վրա» (1960), «Սատանան և տասը պատվիրանները» (1962), «Արարատ» (2002) և այլն։ Ազնավուրը հպարտանում է իր հայկական ծագմամբ, մշտապես սատար է կանգնում Հայաստանին։ Հայկական թեմաներով են նրա «Քեզ համար, Հայաստան», «Նրանք ընկան» (Ցեղասպանության վաթսունամյակին), «Ինքնակենսագրություն» երգերը։ Դստեր՝ Սեդա Ազնավուրի հետ հայերեն կատարել է Սայաթ-Նովայի «Աշխարհումս» երգը։ 1988-ի սպիտակյան ավերիչ երկրաշարժից անմիջապես հետո հիմնադրել է «Ազնավուրը Հայաստանին» բարեգործական հիմնադրամը։ Հայաստանի մշտական դեսպանն է ՅՈՒՆԵՍԿՕ-ում։ 1964, 1996 և 2006 թթ. համերգներ է տվել Հայաստանում։ Գյումրիում կանգնեցված է Ազնավուրի արձանը, նրա անունով է կոչվում Երևանի հրապարակներից մեկը։

2009թ. մայիսի 4-ից` Ժնեւի ՄԱԿ-ի գրասենյակում եւ այլ միջազգային կազմակերպություններում Հայաստանի Հանրապետության մշտական ներկայացուցիչ, 2009թ. մայիսի 5-ից` Շվեյցարիայի Համադաշնությունում Հայաստանի Հանրապետության արտակարգ եւ լիազոր դեսպան:

Շառլ Ազնավուրի արձանը Գյումրիում, Շառլ Ազնավուրի հրապարակում

Ֆիլմեր

• Շառլ Ազնավուր, Հայաստան 1989 (1989) ռեժիսոր Լևոն Մկրտչյան
  ՀԱՅՖԻԼՄ կինոստուդիա, գունավոր՝ 35mm
  Ֆիլմը պատմում է նշանավոր երգչի երկրաշարժից տուժած Հայաստան, իր այցելության մասին։
  Շառլ Ազնավուրը այս ֆիլմում հիմնականում խոսում է հայերեն։

http://www.youtube.com/watch?v=tHEd5L1i6gg

Արտաքին հղումներ

Վիքիքաղվածքն ունի քաղվածքների հավաքածու, որոնք վերաբերում են՝

Շառլ Ազնավուրին

Մեդիաֆայլեր այստեղ՝ Շառլ Ազնավուր

• Պաշտոնական կայքը
• ԱԶՆԱՎՈՒՐԸ ԱԶՆԱՎՈՒՐԻ ՄԱՍԻՆ-(ԹԱՐԳՄ. ՍՈՒՐԵՆ ԲՈՒՐՍԱԼՅԱՆԻ)
• ԱԶՆԱՎՈՒՐԸ ԾԱՆՈԹ ԵՎ ԱՆԾԱՆՈԹ-ՍԱՄՎԵԼ ԳԱՍՊԱՐՅԱՆ

Նախորդող Զոհրաբ Մնացականյան

Ժնեւի ՄԱԿ-ի գրասենյակում եւ այլ միջազգային կազմակերպություններում Հայաստանի Հանրապետության մշտական ներկայացուցի Շառլ Ազնավուր 2009թ. մայիսի 4-ից

Հաջորդող ----

Նախորդող Զոհրաբ Մնացականյան

Շվեյցարիայի Համադաշնությունում Հայաստանի Հանրապետության արտակարգ եւ լիազոր դեսպան Շառլ Ազնավուր 2009թ. մայիսի 5-ից

Հաջորդող ----