Մառախուղ

Վիքիպեդիայից՝ ազատ հանրագիտարանից

Մառախուղ, օդի երկրամերձ շերտում ջրի մանր կաթիլների կամ սառցի բյուրեղների կուտակում, որը նվազեցնում է հորիզոնական տեսանելիությունը մինչև 1 կլոմետր։ Հակառակ դեպքում Օդի այս կարգի պղտորությունը կոչվում է մշուշ կամ միգաշղարշ։ Ավելի լայն իմաստով մառախուղը կաթիլահեղուկային դիսպերս ֆազով աերոզոլ Է, որն առաջանում է գերհագեցած գոլորշիների կոնդենսացումից։ Տարբերում են մառախուղի 3 հիմնական տեսակ՝ սառեցման, գոլորշիացման և խառը։ Սառեցման մաախուղը առաջանում Է, երբ օդի ջերմաստիճանը նվազելով (ադվեկտիվ կամ ռադիացիոն) իջնում է ցողի կետից, դիտվում է մեծ մասամբ գիշերները կամ վաղ առավոտյան։ Գոլորշիացման մառախուղ երկրի տաք մակերևույթից դեպի ցուրտ օդը տեղի ունեցող գոլորշիացման արդյունք Է, դիտվում է տարվա ցուրտ եղանակներին ջրային մակերևույթների և գետերի վրա։ Իսկ սառը մառախուղ առաջանում է տարբեր ջերմաստիճանի և խոնավության օդային զանգվածների խառնվելու հետևանքով։ Տարբերում են նաև ներզանգվածային և ճակատային (առաջանում է մթնոլորտային ճակատի շրջակայքում) մառախուղներ։ Հաճախ դիտվում են ներզանգվածային և սառեցման մառախուղներ։

Այս հոդվածի կամ նրա բաժնի որոշակի հատվածի սկզբնական տարբերակը վերցված է Հայկական սովետական հանրագիտարանից, որի նյութերը թողարկված են Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) թույլատրագրի ներքո։ CC-BY-SA-icon-80x15.png