Հրայր Կիրակոսյան
- Վիքիպեդիայում կան հոդվածներ Կիրակոսյան ազգանունով այլ մարդկանց մասին։
| Հրայր Կիրակոսյան | |
|---|---|
| Ծնվել է | սեպտեմբերի 24, 1961 |
| Ծննդավայր | Ալավերդի |
| Մահացել է | սեպտեմբերի 29, 1992 (31 տարեկան) |
| Մահվան վայր | Գյուլիստան |
| Մասնագիտություն | օդաչու |
Հրայր Մեսրոպի Կիրակոսյան (սեպտեմբերի 24, 1961, Ալավերդի, Հայկական ԽՍՀ, ԽՍՀՄ - սեպտեմբերի 29, 1992, Գյուլիստան, Գերանբոյի շրջան, Ադրբեջան), հայ օդաչու-հրամանատար, Արցախյան ազատամարտի մասնակից։
1980–82 թվականներին ծառայել է ԳԴՀ-ում տեղակայված ԽՍՀՄ զորախմբում։ Ավարտել է Կրեմենչուգի (Ուկրաինա) քաղաքացիական ավիացիայի օդաչուական ուսումնարանը (1985)։ 1985–89 թվականներին աշխատել է Սալեխարդի (Տյումենի մարզ, Ռուսաստան) քաղաքացիական ավիացիայի վարչությունում, 1990 թվականից՝ «Էրեբունի» օդանավակայանում։
1990–92 թվականներին Մի-8 ուղղաթիռի անձնակազմում (2-րդ օդաչու, ապա՝ հրամանատար) մասնակցել է ՀՀ սահմանամերձ շրջանների և ԼՂ ինքնապաշտպանությանը։ Ընդհանուր թռիչքաժամը ԼՂ, Շահումյան և Գետաշեն կազմել է 852 ժամ։ Հետմահու պարգևատրվել է ԼՂՀ «Մարտական խաչ» 2-րդ աստիճանի շքանշանով, Արցախի ազատության պայքարում կատարած հատուկ ծառայությունների համար 15.07.2007 թ-ին հետմահու պարգևատրվել է՝ Մայրական երախտագիտություն շքանշանով (ԼՂՀ «Մայրություն» ՀԿ —ի նախագահի կողմից), Արիության մեդալով(2003թ․ ՀՀ Նախագահի ապրիլի 2-ի հրամանագրով), Հայաստանի Երկրապահ հուշամեդալով(2011թ․հունվարի 27-ի հրամանագրով)։ Զոհվել է հերթական մարտական առաջադրանք կատարելիս։ Թաղված է Եռաբլուրում[1]։
Ծանոթագրություններ[խմբագրել | խմբագրել կոդը]
- ↑ Ղարաբաղյան ազատագրական պատերազմ.1988-1994, Ե., ՀՀՀ, 2004, էջ 680։