Հայաստանի պետական երիտասարդական նվագախումբ

Վիքիպեդիայից՝ ազատ հանրագիտարանից

Հայաստանի պետական երիտասարդական նվագախումբը Երևանում գործող դասական երաժշտական նվագախումբ է։ Հիմնվել է 2005 թ.։ Հիմնադրումից միչև օրս գլխավոր դիրիժորն է Սերգեյ Սմբատյանը։

Պատմությունը[խմբագրել]

ՀԱՅԱՍՏԱՆԻ ՊԵՏԱԿԱՆ ԵՐԻՏԱՍԱՐԴԱԿԱՆ ՆՎԱԳԱԽՈՒՄԲ Հայաստանի պետական երիտասարդական նվագախումբը հիմնել է դիրիժոր Սերգեյ Սմբատյանը 2005 թ., ով հանդիսանում է վերջինիս գեղարվեստական ղեկավարն ու գլխավոր դիրիժորը։ Նվագախմբի երիտասարդ ու տաղանդավոր երաժիշտների աշխատասիրությունն ու նվիրվածությունը, կյանքի ուղու ճիշտ ընտրության գիտակցումը և նպատակաուղղվածությունը հնարավոր դարձրին կատարելագործել նրանց կատարողական արվեստը։ Երաժիշտները լի են էներգիայով, նվիրումով ու նպատակասլացությամբ, ինչի շնորհիվ արժանանում են միջազգային պարգևների։ Իր գոյության կարճ ժամանակահատվածում նվագախումբը հասցրել է հանդես գալ բազմաթիվ համերգներով Հայաստանում և նրա սահմաններից դուրս։ Նվագախմբի ելույթները միշտ ջերմորեն ընդունվում են հանդիսատեսի կողմից, արժանանում երաժշտասեր հասարակության բարձր գնահատականին, հիացնում Գերմանիայի, Ֆրանսիայի, Ռուսաստանի, Բելգիայի, Նիդեռլանդների և այլ երկրների հեղինակավոր համերգասրահների ունկնդիրներին։ Նվագախումբը Սերգեյ Սմբատյանի գլխավորությամբ ելույթ է ունեցել աշխարհի հանրահայտ համերգասրահներում՝ Opera Garnier (Փարիզ), Konzerthaus (Բեռլին), Dr. Anton Philipszaal (Հաագա), Չայկովսկու անվան ֆիլհարմոնիայի և Կոնսերվատորիայի մեծ համերգասրահ (Մոսկվա), Palais des Beuax-Arts (Բրյուսել) և այլն։ Երիտասարդական նվագախումբը սերտ ստեղծագործական հարաբերություններ ունի բեմի աշխարհահռչակ վարպետների հետ՝ Վալերի Գերգիև, Վլադիմիր Սպիվակով, Մաքսիմ Վենգերով, Դենիս Մացուև, Վադիմ Ռեպին, Գրիգորի Ժիսլին, Քշիշտոֆ Պենդերեցկի, Վահագն Պապյան, Բորիս Բերեզովսկի և այլոք։ 2008 թ. ՀՀ կառավարության որոշմամբ նվագախումբը ստանձնեց պետական կարգավիճակ՝ բարձր վարպետության և ժամանակակից երաժշտական միտումների խորն ընկալման համար։ Երիտասարդական նվագախումբը մշտապես մասնակցություն է ունենում միջազգային փառատոներում՝ §Մոսկովյան Զատկի փառատոն¦ (Մոսկվա), §YOUNG.EURO.CLASSIC¦ (Բեռլին), §Օդեսան դիմավորում է ընկերներին¦ (Օդեսա), §Kultursommer Nordhessen¦ (Կասսել), §Young.Classic.Wratislavia¦ (Վրոցլավ) և այլն։ Երիտասարդ երաժիշտները անընդմեջ նախաձեռնում և իրականացնում են բարեգործական միջոցառումներ Հայաստանում և արտերկրում։ 2007 թ-ից նվագախումբը հանդիսանում է Արամ Խաչատրյանի անվան միջազգային մրցույթի պաշտոնական նվագախումբ։ Հայաստանի Հանրապետության անկախության 20-ամյակի շրջանակներում 2011 թ. սեպտեմբեր-հոկտեմբեր ամիսներին նվագախումբը հյուրախաղերով մեկնել է եվրոպական մի շարք երկրներ։ Ներկայացնելով հայ, ռուս և արևմտաեվրոպական կոմպոզիտորների բազմաժանր երկացանկ՝ նվագախմբի երիտասարդ երաժիշտները արժանացան բարձր գնահատականի. հանդիսատեսը մեծ խանդավառությամբ ընդունեց նրանց կատարողական բարձր վարպետությունը։ Նվագախմբի երկացանկը անչափ բարդ է և հասուն՝ ընդգրկելով դասականից մինչև ժամանակակիցը։ Նվագախումբը համագործակցում է ժամանակակից կոմպոզիտորների հետ և կատարում նրանց նոր ստեղծագործությունները։ 2010 թ-ից Հայաստանի պետական երիտասարդական նվագախմբի նախաձեռնությամբ անց է կացվում Հայ կոմպոզիտորական արվեստի փառատոնը՝ ՀՀ Նախագահի բարձր հովանու ներքո։ 2011 թ. «Sony DADC» ձայնագրման ստուդիայում Հայաստանի պետական երիտասարդական նվագախումբը գեղարվեստական ղեկավար Սերգեյ Սմբատյանի գլխավորությամբ թողարկեց անդրանիկ «Music is the answer» ձայնասկավառակը, որի մեջ ընդգրկված են Էդվարդ Հայրապետյանի, Պյոտր Չայկովսկու և Դմիտրի Շոստակովիչի լավագույն ստեղծագործությունները։

2007 թվականից նվագախումբը հանդիսանում է Արամ Խաչատրյանի անվան միջազգային մրցույթի պաշտոնական նվագախումբ։[1]

Աղբյուրներ[խմբագրել]