Կրոնի պատմության պետական թանգարան

Կրոնի պատմության պետական թանգարան
Տեսակ	թանգարան
Երկիր	Ռուսաստան
Տեղագրություն	Սանկտ Պետերբուրգ
Վայր	Սանկտ Պետերբուրգ
Հասցե	Санкт-Петербург, Почтамтская ул, 14/5
Հիմնադրվել է	1932
Կայք	gmir.ru

Կրոնի պատմության պետական թանգարան (ռուս.՝ Государственный музей истории религии, նախկինում՝ Կրոնի ու աթեիզմի պատմության թանգարան), թանգարան Սանկտ Պետերբուրգում։ Ռուսաստանի միակ^[1] ու աշխարհի այն փոքրաթիվ թանգարաններից է, որի ցուցադրությունները նվիրված են կրոնի առաջացման ու զարգացման պատմությանը։ Թանգարանի հավաքածուն ընդգրկում է շուրջ 180 000 ցուցանմուշ, որոնցից ամենահինը վերաբերում է մ.թ.ա. VI հազարամյակին։

Պատմություն[խմբագրել | խմբագրել կոդը]

Կրոնի պատմության թանգարանը կազմավորվել է ԽՍՀՄ Գիտությունների ակադեմիայի կազմում ԽՍՀՄ Գիտությունների ակադեմիայի նախագահության 1931 թ. ապրիլի 26-ի որոշման հիման վրա։ Թանգարանառանցքը կազմում էր հակակրոնական ցուցադրությունը, որ 1930 թ. բացվել էր Լենինգրադում՝ Ձմեռային պալատում։ Թանգարանի պաշտոնական բացումը տեղի է ունեցել 1932 թ. նոյեմբերի 15-ին։ Թանգարանի բացման նախաձեռնողն ու նրա առաջին տնօրենը եղել է ռուս անվանի գիտնական, կրոնի պատմաբան, էթնոգրաֆ ու մարդաբան Վլադիմիր Բոգարեզը (1865—1936)։ Թանգարանի կազմակերպմանն ու հետագա գործունեության շարունակմանը մեծապես նպաստել է Միխայիլ Շախնովիչը, որ 1944-1960 թթ. զբաղեցրել է թանգարանի տնօրենի տեղակալի պաշտոնը։ 1976—1986 թթ. թանգարանի տնօրենն է եղել Յակով Կոժուրինը։

Մշտական ցուցադրություն[խմբագրել | խմբագրել կոդը]

Ներկայումս Կրոնի պատմության պետական թանգարանում այցելուներին են ներկայացվում մշտական ցուցադրության հետևյալ բաժինները՝

Ռուսական ուղղափառության պատմություն,
կաթոլիկություն,
բողոքականություն,
Արևելքի կրոններ. բուդդայականություն, հինդուիզմ, կոնֆուցիականություն, դաոսականություն, սինտոիզմ,
Իսլամ։

2012 թ. ապրիլի 26-ին թանգարանում բացվել են հետևյալ բաժինները՝

Հնագույն հավատալիքներ ու ծեսեր,
Հին աշխարհի կրոններ. պոլիտեիզմ,
Հին աշխարհի կրոններ. հուդայականություն և մոնոթեիզմի առաջացումը
Քրիստոնեության ծագումը։

2011 թ. փետրվարին թանգարանում բացվել է մանկական հատուկ բաժին, որտեղ գտնվող «Սկզբի սկիզբը» մշտական ցուցադրությունը ներկայացնում է աշխարհի առաջացումն ու նրա կառուցվածքը։

Կրոնի պատմության ու կրոնագիտության հարցերի գիտամեթոդական կենտրոն[խմբագրել | խմբագրել կոդը]

Կրոնի պատմության պետական թանգարանը հանդիսանում է Ռուսաստանի Դաշնության մշակույթի նախարարության՝ համառուսաստանյան գիտամեթոդական կենտրոն, որը կրոնի պատմության ու կրոնագիտության գիտամեթոդական հարցերում օգնում է Ռուսաստանի թանգարաններին, որոնք զբաղվում են կրոնին վերաբերող առարկաների պահպանությամբ և ուսումնասիրությամբ։

Թանգարանի գիտական գրադարանը[խմբագրել | խմբագրել կոդը]

Գրքերի բաժինը (ներկայում՝ Գիտական գրադարան) ստեղծվել է 1932 թվականին։ Ներկայումս գրադարանի ֆոնդը ներառում է շուրջ 192 000 միավոր գիրք։ Այն կրոնի ու աթեիզմի հարցերին վերաբերող գրքերի ամենամեծ հավաքածուներից է և Ռուսաստանի միակ գրադարանն է, որտեղ այդպես ամբողջական ներկայացված է տարբեր բնագավառների վերաբերող գրականություն՝ քրիստոնեություն (ուղղափառություն, կաթոլիկություն, բողոքականություն), հուդայականություն, իսլամ, բուդդայականություն, դաոսականություն, սինտոիզմ և այլն։

Գրադարանում պահպանվում են նաև պատմությանը, փիլիսոփայությանը, հոգեբանությանը, հնէաբանությանը, ժողովրդագրությանը, կերպարվեստին, թանգարաններին վերաբերող գրքեր։

Գրադարանում պահպանվում են XVII—XXI դդ. հրատարակված գրքեր՝ հետևյալ բաժիններով՝

Աստվածաշնչի հրատարակություններ,
Մաոնական գրականության հավաքածու,
Աստվածաբանական ու մինչհեղափոխական շրջանի գրքերի հավաքածու,
Հոգևոր ակադեմիաների ու սեմինարիաների հրատարակությունների հավաքածու,
XIX դարի երկրորդ կեսի ու XX դարի սկզբի կրոնափիլիսոփայական հրատարակությունների հավաքածու,
Հին ծիսական գրականության հավաքածու,
1920—1930-ական թթ. հակակրոնական գրականության հավաքածու,
Թանգարանի աշխատակիցների աշխատությունների հավաքածու,
Եվրոպական լեզուներով գրքերի «Rossica» հավաքածու։