Կրոկոդիլ (հանդես)

Կրոկոդիլ (ռուս.՝ Крокодил, «Կոկորդիլոս»), երգիծական հանդես նախկին Խորհրդային Միությունում (1922-1991 թթ.), իսկ ավելի ուշ՝ Ռուսաստանում (2005-2008 թթ.)։ Առաջին անգամ լույս է տեսել 1922 թվականին, Մոսկվայում։ Եղել է «Պրավդայի» հրատարակությունը (1932 թ.-ից)։ Կազմակերպողը և առաջին խմբագիրն է եղել Կ. Երեմեևը։ Պարգևատրվել է Աշխատանքային կարմիր դրոշի շքանշանով (1972 թ.)։

Չնայած ԽՍՀՄ-ում քաղաքական սատիրայով զբաղվելու վտանգավորությանը, թերթին որոշակիորեն թույլ է տրվել կծու երգիծանքի ենթարկել քաղաքական գործիչների, ինչպես նաև ծաղրի ենթարկել բազմաթիվ իրադարձություններ։

Թերթը բավականին ինտենսիվորեն ծաղրանքի է ենթարկել նաև կապիտալիստական երկրներին, ինչպես նաև ծաղրել բազմաթիվ քաղաքական, էթնիկական և կրոնական խմբերի, որոնք ենթադրաբար հակադրվել են խորհրդային համակարգին։ Օրինակ, ստալինյան բռնապետության վերջին տարիներին, «Բժիշկների գործի» շրջանակներում թերթում տեղ էին գտնում զանազան հակասեմական նյութեր և ծաղրանկարներ։

Հանրապետություն	Անվանում	Թարգմանություն
Ուկրաինական ԽՍՀ	Перець	Պղպեղ
Բելառուսական ԽՍՀ	Вожык	Ոզնի
Ուզբեկիստանի ԽՍՀ	Муштум	Բռունցք
Ղազախստանի ԽՍՀ	Ара	Իշամեղու
Վրացական ԽՍՀ	ნიანგი	Կոկորդիլոս
Ադրբեջանական ԽՍՀ	Кирпи	Ոզնի
Լիտվական ԽՍՀ	Šluota	Ցախավել
Մոլդովական ԽՍՀ	Кипэруш	Պղպեղ
Լատվիական ԽՍՀ	Dadzis	Փուշ
Կիրգիզական ԽՍՀ	Чалкан	Եղինջ
Տաջիկական ԽՍՀ	Хорпуштак	Ոզնի
Հայկական ԽՍՀ	Ոզնի	Ոզնի
Թուրքմենիստանի ԽՍՀ	Токмак	Թակ
Էստոնական ԽՍՀ	Pikker	Pikker
Բաշկիրիայի ԻԽՍՀ	Хэнэк	Եղան
Չուվաշական ԻԽՍՀ	Капкан	Ծուղակ
Կոմիի ԻԽՍՀ	Чушканзі	Իշամեղու
Մարիի ԻԽՍՀ	Пачемыш	Իշամեղու
Թաթարական ԻԽՍՀ	Чаян	Կարիճ
Ուդմուրտական ԻԽՍՀ	Шӧкыч	Ձիաբոռ

Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից (հ․ 5, էջ 696)։