Կոստանդնուպոլսի Բ տիեզերական ժողով
Կոստանդնուպոլսի Բ տիեզերական ժողով (հայտնի է նաև որպես Կոստանդնուպոլսի Ա ժողով ), քրիստոնյա եկեղեցու Տիեզերական ժողով: Հրավիրվել է 381թ. Թեոդոսիոս Ա Մեծ կայսեր (379—395) կողմից Կոստանդնուպոլիս քաղաքում: Բոլոր ավանդական քրիստոնյա եկեղեցիների՝ այդ թվում նաև Հայոց եկեղեցու, կողմից ճանաչվում է որպես «տիեզերական»:
Հրավիրվել էր Նիկիայի հավատո հանգանակի բանաձևումների հստակեցման և արիոսական, եվնոմիական, փոթինական, մարկիոնական, սավելական հերձվածների վերաբերյալ Եկեղեցու դիրքորոշման հստակեցման նպատակով։ Ժողովը ընդունեց Սուրբ Երրորդության դավանության բանաձևը, կանոնացվեց հավատո հանգանակը, ինչպես նաև հաստատեց կանոններ, որոնցից մեկով Կոստանդնուպոլսի պատրիարքին՝ Հռոմի պատրիարքից հետո, տրվեց բոլոր եպիսկոպոսների նկատմամբ առավելություն։ Կոստանդնուպոլսի եկեղեցու գլուխ հաստատվեց Գրիգոր Աստվածաբանը։
