Կոչական

Նախադասության մեջ կոչականը ցույց է տալիս, թե ում կամ ինչին է ուղղված խոսքը։ Կոչականը կարող է լինել բառ կամ անվանական բառակապակցություն։ Կոչական գերադաս անդամը ուղղական հոլովով գոյական է կամ գոյականաբար գործածված բառ։

Օրինակներ

• Շնորհավորում եմ, սիրելի՛ս, ծննդյանդ տարեդարձի առթիվ։
• Հիշում եմ դեմքը քո ծեր, մա՛յր իմ անուշ ու անգին:

Դիրքը նախադասության մեջ

Կոչականը նախադասության մեջ կարող է լինել առաջադաս, միջադաս և ետադաս։ Առաջադաս և ետադաս կոչականը տրոհվում է ստորակետով մեկ կողմից։ Կոչականի միջադաս շարադասության դեպքում ստորակետով տրոհվում են 2 կողմերից։

• Երեխանե՛ր, հայտերը լրացնելու օրը փետրվարի 23-ն է։
• Հայտերը լրացնելու օրը, երեխանե՛ր, փետրվարի 23-ն է։
• Հայտերը լրացնելու օրը փետրվարի 23-ն է, երեխանե՛ր։
• -Արա'մ, ես քեզ չեմ հասկանում,ախր դու դեռ բոլորովին երեխա ես,ուր կարող ես գնալ մենակ:

Որոշիչ լրացումով

Եթե կոչականն ունի որոշիչ լրացում, շեշտը դրվում է որոշիչ լրացման վրա։ Օրինակ՝

• Սիրելի՛ երեխաներ, դիմավորե՛ք մեր հյուրին։
• Իմ քաղցրի՛կ բալիկ, քնի՛ր։

Ձայնարկության հետ

Հաճախ կոչականի հետ կարող են գործածվել ձայնարկություններ, որոնք չեն տրոհվում կոչականից։ Օրինակ՝

• Ա՛յ տղա, շրջվի՛ր։

Ձայնարկությունը կարող է նաև կոչականի կազմում չլինել, նրանից անջատվել ստորակետով և չվերցնել նրա շեշտը։

• Վա՛յ, Հասմի՛կ ջան, քիչ էր մնում չճանաչեի։