Լազար Նիկոլա Կառնո

Վիքիպեդիայից՝ ազատ հանրագիտարանից
Nuvola single chevron right.svg Անվան այլ գործածումների համար տես՝ Կառնո (այլ կիրառումներ)

Կառնո (Carnot) Լազար Նիկոլա (1753-1823թթ.), ֆրանսիական պետական և ռազմական գործիչ, մաթեմատիկոս։ Ֆրանսիայի ինստիտուտի անդամ (1796թ.)։ 1791-1792թթ.՝ Օրենսդիր ժողովի և 1792-1795թթ.` Կոնվենտի անդամ: Յակոբինյան դիկտատուրայի շրջանում եղել է հասարակական փրկության կոմիտեի անդամ (1793թ.) և ինտերվենտների ու ռոյալիստների դեմ ռազմական պայքարի կազմակերպիչ: Թերմիդորյան հեղաշրջման(1794թ.) ժամանակ հանդես է եկել Ռոբեսպիերի դեմ: 1795-97թթ. Կառնոն Դիրեկտորիայի անդամ էր: Ֆրյուկտիդորի 18-ի հեղաշրջումից հետո փախել է Ֆրանսիայից: 1800թ. վերադարձել է և նշանակվել ռազմական նախարար, 1802թ. մարտից՝ Տրիբունատի անդամ: Նապոլեոնի համախոհ մնալով հանդերձ՝ քվեարկել է կայսրության դեմ: 1815-ի «Հարյուր օրերի» ընթացքում նապոլեոնյան կառավարության ներքին գործերի նախարարն էր, ստացել է կոմսի տիտղոս։ Բուրբոնների երկրորդ վերականգնումից հետո արտաքսվել է Ֆրանսիայից (1815թ.)։ Կառնոյի մաթեմատիկական աշխատանքները վերաբերում են երկրաչափությանը և անվերջ փոքրերի հաշվի հիմնավորմանը։ Կառնոյի՝ անալիզի հիմնավորման զանազան եղանակների վերլուծությունը և անալիտիկ ֆունկցիաների Լագրանժի տեսության քննադատությունը մասամբ նախապատրաստեցին անալիզի բարենորոգումը XIXդ.։

Այս հոդվածի կամ նրա բաժնի որոշակի հատվածի սկզբնական տարբերակը վերցված է Հայկական սովետական հանրագիտարանից, որի նյութերը թողարկված են Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) թույլատրագրի ներքո։ CC-BY-SA-icon-80x15.png