Ի՞նչ, որտե՞ղ, ե՞րբ

Վիքիպեդիայից՝ ազատ հանրագիտարանից
(Վերահղված է Ի՞նչ որտե՞ղ ե՞րբից)
Ի՞նչ, որտե՞ղ, ե՞րբ
Что? Где? Когда?
Ստեղծող Վլադիմիր Վորոշիլով,
Նատալյա Ստեցենկո
Արտադրող երկիր ԽՍՀՄ, Հայաստան - Արմենիա (հեռուստաընկերություն)
Հեռարձակում
Սկզբնական եթեր ԽՍՀՄ Կենտրոնական հեռուստատեսություն
և համամիութենական ռադիո,
4 սեպտեմբերի, 1975 թ.


Հաղորդման գոնգը

Ի՞նչ, որտե՞ղ, ե՞րբ ինտելեկտուալ հեռուստախաղը ստեղծվել է 1975 թվականին Մոսկվայում հեռուստապրոդյուսեր և հաղորդավար Վլադիմիր Վորոշիլովի և Նատալյա Ստեցենկոյի կողմից։ Արդեն 39 տարի է այն հանդիսանում է ռուսաստանյան հեռուստատեսության հեռուստահաղորդումներից մեկը։ Հայաստանում «Ի՞նչ,Որտե՞ղ,Ե՞րբ» ինտելեկտուալ շարժումը սկսել է 80-ականների կեսերին իրարից անկախ, միանգամից երեք քաղաքաներում՝ Երևանում, Գյումրիում և Վանաձորում։ Հետագայում Երևանի և Գյումրու ակումբները լուրջ զարգացում են ապրել և մասնակցել հեռուստատեսային «Բրեյն-ռինգի» նկարահանումներին։ 1986-87 թվականներին ԵրՊԻ ուսանողների ուժերով, Գագիկ Բունիաթյանի նախաձեռնությամբ, ստեղծվում է «Ի՞նչ,Որտե՞ղ,Ե՞րբ» ակումբը, որի անդամները՝ Սիմոն Սիմոնյանը, Արթուր Հարությունյանը, Հարություն Ֆռանգուլյանը սկզբնական շրջանում խաղում են (որոշ դեպքերում նաև հանդիսատեսի ներկայությամբ) «Կանաչ» դահլիճում։ Ըստ Գագիկ Բունիաթյանի՝ ավելի ուշ ակումբը տեղափոխվում է Երևանի Երիտասարդական պալատ, որտեղ և պաշտոնական կարգավիճակ է ստանում։ Հենց այս ակումբի նախաձեռնությամբ էլ կայանում է հայ գիտակների առաջին հեռուստափորձը. Գագիկ Բունիաթյանի թիմը 1988 թվականի հուլիսին մասնակցում է «Ի՞նչ,Որտե՞ղ,Ե՞րբ» ինտելեկտուալ հեռուստախաղի նկարահանումներին։ Այդ ժանանակ հեռուստախաղը նկարահանվում էր «Սովինցենտրի» տարածքում։ Ավելի ուշ, ակումբին միանում են Ալեքսանդր Թումանյանը, Տիգրան Քուչուկյանը, Նորա Ալանակյանը, Նատալյա Հարությունյանը, Դմիտրի Թումասովը, Հարություն Գիլոյանը։ Այս կազմից «Ի՞նչ,Որտե՞ղ,Ե՞րբ» հայկական հեռուստախաղերին մինչ օրս մասնակցում է միայն Նորա Ալանակյանը։ Այս կազմը կրկին վերադառնում է ԵրՊԻ «Կանաչ» դահլիճ։ Ըստ Նորա Ալանակյանի, 1992 թվականի մարտին հայկական առաջին թիմը մեկնել է հեռուստատեսային «Բրեյն-ռինգ»-ի նկարահանումների։ Հետագայում՝ այս խաղի շրջանակներում, հայկական թիմերից լավագույն արդյունք է ցույց տվել Շանթ Գրիգորյանի թիմը Գյումրիից։ Այս թիմի մի քանի ներկայացուցիչներ՝ Սուրեն Մանուկյանը, Արմեն Մկրտչյանը, Շանթ Գրիգորյանը և Արմեն Աշոտյանը սկսեցին մասնակցել նաև «Ի՞նչ,Որտե՞ղ,Ե՞րբ» հայկական հեռուստախաղերին։

Առաջին առաջնություն[խմբագրել]

Նորա Ալանակյան

«Ի՞նչ, որտե՞ղ, ե՞րբ» ինտելեկտուալ խաղի Հայաստանի առաջին առաջնությունը տեղի է ունեցել 1994 թվականին։ Այդ տարի չեմպիոն է հռչակվել «Ֆակիրներ» թիմը, որի ավագն էր Հայկ Դեմոյանը, իսկ թիմի կազմում էր Տիգրան Քոչարյանը։

Ներկայիս վիճակ[խմբագրել]

«Ի՞նչ,Որտե՞ղ,Ե՞րբ» ինտելեկտուալ խաղի Հայաստանի առաջնության գործող չեմպիոնը «Պերեզագրուզկա» թիմն է (ավագ՝ Տիգրան Քոչարյան), որը հանդիսանում է Հայաստանի քառակի չեմպիոն, իսկ ամենատիտղոսակիր թիմը «ԴԱՖ»-ն է(ավագ՝ Լևոն Նիկողոսյան), որը վեց անգամ նվաճել է Հայաստանի չեմպիոնի կոչումը։ «Ի՞նչ,Որտե՞ղ,Ե՞րբ» հեռուստախաղի էլիտար ակումբում հայ գիտակներից մասնակցել են Շանթ Գրիգորյանը և Նատալյա Մանուսաջյանը։

Խաղի հեռարձակում[խմբագրել]

2002 թվականից «Արմենիա» հեռուստաընկերությունը սկսեց եթեր հեռարձակել «Ի՞նչ,Որտե՞ղ,Ե՞րբ» հեռուստախաղի հայաստանյան տարբերակը։ Առաջին նկարահանումները տեղի ունեցան Հովհաննես Շարամբեյանի անվան ժողովրդական արվեստի թանգարանի տարածքում։ Հետագայում բոլոր խաղերը նկարահանվել են «ԱՐՄԵՆԻԱ» հեռուստաընկերության տաղավարներում (2002-04թվականներին՝ Երիտասարդական պալատ, 2004-05 թվականներին՝ Եղվարդի խճյուղի 1)։ Այդ ժամանակահատվածում եթեր է հեռարձակվել 8 եթերաշրջան (յուրաքանչյուր եթերաշրջանը բաղկացած էր 7 խաղից՝ 6 ընտրական և մեկ եզրափակիչ)։ Խաղերի գլխավոր մրցանակն էր «Բյուրեղապակյա Բուն»։ Խաղերին մասնակցում էին ինչպես անվանի ռուս գիտակները՝ Ալեքսանդր Դրուզ, Մաքսիմ Պոտաշով, Ֆյոդոր Դվինյատին, Բորիս Բուրդա, Վիկտոր Սիդնև, Ալեքսանդր Ռուբին, Ալես Մուխին, Իննա Դրուզ, Իլյա Նովիկով, այնպես էլ հայ գիտակները՝ Տիգրան Մաղաքյան, Տիգրան Քոչարյան, Սամվել Խաչատրյանը, Լևոն Գրիգորյան, Նորա Ալանակյանը, Անուշ Տիգրանյանը, Գարիկ Բալյանը, Սուրեն Մանուկյանը, Շանթ Գրիգորյանը, Արմեն Աստվածատրյանը, Լևոն Նիկողոսյանը, Կարեն Սարգսյանը, Արմեն Մկրտչյանը, Վահե Տեր-Մինասյանը, Վահան Քալաջյանը, Իրինա Վոպյանը, Ռոբերտ Թաթոյանը, Մարգարիտա Ջրաղացպանյանը և այլոք։ Խաղերի վարողն է Կարեն Քոչարյանը։ Հեռարձակման դադարեցում Ֆինանսական պատճառներով 2005 թվականին հեռուստախաղի նկարահանումները ժամանակավորապես դադարեցվեցին։ 2010 թվականի մարտից «Արմենիա» հեռուստաընկերության եթերում վերսկսվեցին «Ի՞նչ,Որտե՞ղ,Ե՞րբ» հեռուստախաղի նկարահանումները։ Այդ պահից սկսած մինչ օրս, համաձայն «Արմենիա» հեռուստաընկերության, «Փի-Արտ» և «Իգրա Թի Վի» ընկերությունների միջև ձեռք բերված պայմանավորվածությունների «Ի՞նչ,Որտե՞ղ,Ե՞րբ» հեռուստախաղի հայաստանյան տարբերակը եթեր է հեռարձակվում տարեկան երեք (գարնանային, աշնանային, ձմեռային) եթերաշրջան։ Յուրաքանչյուր եթերաշրջանը բաղկացած էր 8 խաղից՝ 5 ընտրական խաղ, 2 ոչ մրցութային խաղ և մեկ եզրափակիչ։ Սկսած 2010 թվականից հեռուստախաղի գլխավոր մրցանակը «Մարմարե արծիվն»-ն է։

«Մարմարե արծիվ»-ի մրցանակակիրներ[խմբագրել]

Մարմարե արծիվ

Ըստ խաղի կանոնակարգի գլխավոր մրցանակը՝ «Մարմարե արծիվ»-ը ստանում է եզրափակչում հաղթող թիմի լավագույն խաղացողը։ Եթե եզրափակիչ խաղում հաղթում են գիտակները, ապա այդ թիմի լավագույն խաղացողը (լավագույն խաղացողին որոշում են խաղի հովանավորներն ու եթերաշրջանում մասնակցած թիմերի ավագները) դառնում է «Մարմարե արծիվ»-ի մրցանակակիր, իսկ եթե հաղթում են հեռուստադիտողները, ապա նույն կերպ ընտրվում է եզրափակիչ խաղում հաղթող հարցերից որևէ մեկի հեղինակը։ Մինչ օրս «Մարմարե արծիվ»-ի մրցանակակիրներ են դարձել.

Գիտակներ[խմբագրել]

  • Սուրեն Մանուկյան – Գարուն(2010)
  • Լևոն Գրիգորյան - Ձմեռ(2010)
  • Արման Աբովյան - 2012թ Գարուն(2012)
  • Հայկ Ղազազյան - Աշուն(2012) և Գարուն(2013)
  • Արմեն Աստվածատրյան - Ձմեռ(2012)
  • Էմիլ Միրզոյան - Աշուն(2013)
  • Սամվել Խաչատրյան - Ձմեռ(2013)

Հեռուստադիտողներ[խմբագրել]

  • Ռուզաննա Սիմոնյան - Աշուն(2010)
  • Զարինա Բարսեղովա - Գարուն(2011)
  • Էլզա Ստեփանյան - Աշուն(2011)
  • Միսակ Մարկոսյան - Ձմեռ(2011)

Ոչ մրցութային[խմբագրել]

Ոչ մրցութային խաղերին այս տարիների ընթացքում մասնակցել են Հայաստանի քաղաքական գործիչներ, լրագրողներ, հեռուստա և ռադիոհաղորդավարներ, շոումեններ, ոստիկաններ, դպրոցականներ՝ Արմեն Աշոտյան, Վահան Հովհաննիսյան, Վիգեն Սարգսյան, Նաիրա Զոհրաբյան, Մկրտիչ Արզումանյան, Եգոր Գլումով, Արման Սաղաթելյան, Շուշան Պետրոսյան, Արամ Աբրահամյան, Պետրոս Ղազարյան, Գևորգ Ալթունյան, Նարեկ Մարգարյան, Սերգեյ Սարգսյան, Հրանտ Թոխատյան։ 2014 թվականի գարնանային խաղերին (եթեր է հեռարձակվում 2014 թվականի մարտի 15-ից) առաջին անգամ մասնակցեց Ուկրաինայում հայկական համայնքի թիմը։ Հեռուստադիտողների թիմում, այս տարիների ընթացքում ընդգրկվել են աշխարհի ամենատարբեր երկրների ներկայացուցիչներ։ Կազմակերպիչները նամակներ են ստացել Լոս-Անջելեսից և Սիդնեյից, Փարիզից և Մոսկվայից, Թբիլիսիից և Մյունխենից, Կրասնոդարից և Լոնդոնից, ինչպես նաև Հայաստանի և Արցախի գրեթե բոլոր բնակավայրերից։ «Ի՞նչ,Որտե՞ղ,Ե՞րբ» հեռուստախաղը հարց է ստացել անգամ «Կոշ» քրեակատարողան հիմնարկից։ Արբանյակային կապով «Ի՞նչ,Որտե՞ղ,Ե՞րբ» հեռուստախաղի հայաստանյան տարբերակը դիտում են աշխարհի 116 երկրներում։ Խաղի լավագույն գիտակներին գիրք են նվիրել ՀՀ նախադահ Սերժ Սարգսյանը, ՀՀ վարչապետ Տիգրան Սարգսյանը, ԽՍՀՄ ժողովրդական արտիստ Սոս Սարգսյանը, ֆուտբոլիստ Հենրիկ Մխիթարյանը, շախմատի օլիմպիական չեմպիոններ Վլադիմիր Հակոբյանը, Գաբրիել Սարգսյանը և Տիգրան Պետրոսյանը, Պերճ Զեյթունցյանը, Տիգրան Մանսությանը, Գեղամ Գրիգորյանը, Էդուարդ Մարկարովը և այլ անվանի մարդիկ։

Արտաքին հղումներ[խմբագրել]