Թովմա Աքվինացի

Թովմա Աքվինացի (լատիներեն՝ Thomas Aquinas, իտալերեն՝ Tommaso d'Aquino, ծնվել է 1225, Ռոկկասեկա ամրոց, Աքվինո — 7 մարտի 1274, Ֆոսսանուովա մենաստան, Հռոմ), աստվածաբան, փիլիսոփա, օրտոդոքսալ սքոլաստիկայի համակարգող, կաթոլիկ եկեղեցու հայր, հորջորջվել է որպես՝ Doctor Angelicus, Doctor Universalis, «princeps philosophorum» («փիլիսոփաների արքայազն»), թոմիզմի փիլիսոփայական ուղղության հիմնադիր, դոմինիկանյան միաբանության անդամ, 1879 թ-ից ճանաչվել է ամենահեղինակավոր կաթոլիկ կրոնական փիլիսոփա: Կապել է կաթոլիկ եկեղեցու դավանաբանությունը (մասնավորապես, Օգոստինոս Երանելու գաղափարները) Արիստոտելի փիլիսոփայության հետ: Ձևակերպել է Աստծո գոյության հինգ ապացույցները: Ընդունելով բնական գոյության և մարդկային բանականության համեմատական ինքնուրույնությունը՝ գտնում էր, որ բնությունն ավարտվում է վերին օգնության, բանականությունը՝ հավատի, գոյի զուգադրության վրա հիմնված փիլիսոփայական իմացությունն ու բնական աստվածաբանությունը՝ գերբնական հայտնության մեջ: