Աքեմենյաններ

Աքեմենյաններ, պարսկական թագավորական հարստություն մ.թ.ա. 550-330 թվականներին: Կոչվել են նախնու՝ Աքեմենի անունով: Աքեմենը և նրա սերունդներ Չիշպիշը, Կյուրոս I, Կյուրոս II Մեծը եղել են Պարսուա և Անշան երկրների թագավորներ, վասալական կախման մեջ գտնվել Ասորեստանի, ապա Մարաստանի թագավորներից: Կյուրոս II Մեծը 550 թվականին տապալել է Մարաստանի թագավորին և նվաճողական արշավանքներով հիմնել ծավալուն աշխարհակալություն՝ Աքեմենյան պետություն: Կյուրոսի երիտասարդության ժամանակվա որսընկերն էր հայոց արքա Տիգրան I Երվանդյանը: Մ.թ.ա. 546թ. Կյուրոսը պարտության է մատնում Լիդիայի արքա Կրեսոսին և տիրում Փոքր Ասիային: Մ.թ.ա. 539թ. նա գրավում է Բաբելոնը: Կյուրոս Մեծը սպանվում է սկյութների դեմ պատերազմներում: Նրա որդի Կամբյուսեսը մ.թ.ա. 525թ. նվաճում է Եգիպտոսը: Իմանալով, որ Պարսկաստանում խռովություն է բարձրացրել քուրմ Գաումատան (Սմերդիս), նա շուտափույթ վերադառնում է Պարսկաստան, բայց ճանապարհին դավադրաբար սպանվում է: Գահի համար սկսվում է պայքար, որում հաղթում է Վշտասպի որդին ` Դարեհը:

Տես նաև. Աքեմենյան պետություն

Աքեմենյանները՝

Աքեմեն, իշխել է մոտ. 700–675 մ.թ.ա. Չիշպիշ, իշխել է մոտ. 675-640 մ.թ.ա.
Տոհմի ավագ գիծը	Տոհմի կրտսեր գիծը
Կյուրոս I, իշխել է մոտ. 640–600 մ.թ.ա. Կամբյուսես I, իշխել է 600–559 մ.թ.ա. Կյուրոս II Մեծ, իշխել է 559–550 մ.թ.ա.	Արիարամնես, իշխել է մոտ. 640–595 մ.թ.ա. Արշամ, իշխել է 595–550 մ.թ.ա.
Կյուրոս II Մեծ, իշխել է 550-529 մ.թ.ա. Կամբյուսես II, իշխել է 529-522 մ.թ.ա. Դարեհ I Մեծ, իշխել է 522-486 մ.թ.ա. Քսերքսես I, իշխել է 486-465 մ.թ.ա. Արտաքսերքսես I, իշխել է 464-425 մ.թ.ա. Քսերքսես II, իշխել է 425 մ.թ.ա. Սոգդիանոս, իշխել է 425-424 մ.թ.ա. Դարեհ II, իշխել է 423-404 մ.թ.ա. Արտաքսերքսես II, իշխել է 404-358 մ.թ.ա. Արտաքսերքսես III, իշխել է 358-338 մ.թ.ա. Արտաքսերքսես IV Արշես, իշխել է 338-336 մ.թ.ա. Դարեհ III, իշխել է 336-330 մ.թ.ա. Արտաքսերքսես V Բեսս, իշխել է 330-329 մ.թ.ա.

Մեդիաֆայլեր այստեղ՝ Աքեմենյաններ