Արտաշես Ավոյան

Արտաշես Ավոյան
Ծնվել է	դեկտեմբերի 25, 1972(1972-12-25) (51 տարեկան)
Ծննդավայր	Երևան, Հայկական ԽՍՀ, ԽՍՀՄ
Քաղաքացիություն	Հայաստան
Կրթություն	ԵՊՀ իրավաբանական ֆակուլտետ (1994)
Մասնագիտություն	պետական գործիչ
Զբաղեցրած պաշտոններ	Հայաստանի Ազգային ժողովի պատգամավոր և Եվրոպայի խորհրդի խորհրդարանական վեհաժողովի փոխարինող
Կուսակցություն	անկուսակցական

Արտաշես Ռոլանդի Ավոյան (դեկտեմբերի 25, 1972(1972-12-25), Երևան, Հայկական ԽՍՀ, ԽՍՀՄ), պետական գործիչ, ՀՀ ԱԺ նախկին պատգամավոր «Օրինաց երկիր» խմբակցությունից, քաղաքացիական հատուկ ծառայության առաջին դասի պետական խորհրդական։

Կենսագրություն

Ծնվել է 1972 թվականի դեկտեմբերի 25-ին Երևանում։

1994 թվականին ավարտել է Երևանի պետական համալսարանի իրավաբանական ֆակուլտետը։ 1994-1997 թվականներին աշխատել է զինվորական դատախազությունում որպես քննիչ, այնուհետև՝ հատկապես կարևորագույն գործերով ՀԿԳ ավագ քննիչ, քննչական խմբի ղեկավար։ 1997-1998 թվականներին աշխատել է Հայաստանի իրավագետների և քաղաքագետների միությունում՝ որպես իրավաբանական բաժնի մասնագետ։ 1998-1999 թվականներ՝ Հայաստանի Ազգային ժողովի պետական-իրավական հարցերի մշտական հանձնաժողովում՝ ավագ խորհրդատու։

1999-2004 թվականներին եղել է «Օրինաց երկիր» կուսակցության ներկայացուցիչը Հայաստանի կենտրոնական ընտրական հանձնաժողովում։

2004-2005 թվականներին աշխատել է որպես Հայաստանի մշակույթի և երիտասարդության հարցերի նախարարի գլխավոր խորհրդական։ 2005-2007 թվականներին վերանշանակվել է Հայաստանի կենտրոնական ընտրական հանձնաժողովի անդամ։

Աշխատանքային գործունեություն

2007 թվականի մայիսի 12-ին Հայաստանի Ազգային ժողովի չորրորդ գումարման պատգամավոր է ընտրվել համամասնական ընտրակարգով՝ ներկայացնելով «Օրինաց երկիր» խմբակցությունը։ 2007-2008 թվականներին եղել է Հայաստանի Ազգային ժողովի Մարդու իրավունքների պաշտպանության և հանրային հարցերի մշտական հանձնաժողովի անդամ, ինչպես նաև 2008 թվականի մարտի 1-ի լույս 2-ին Երևան քաղաքում տեղի ունեցած արյունալի իրադարձությունների և դրանց պատճառների ուսումնասիրության ժամանակավոր հանձնաժողովի անդամ։ Բազմաթիվ օրենքների, օրենքների նախագծերի հեղինակ և համահեղինակ։ 2008 թվականի մայիսի 29-ից հանդիսացել է Եվրոպայի Խորհրդի խորհրդարանական վեհաժողովում Հայաստանի Ազգային Ժողովի ներկայացուցիչ։

2008 թվականի հուլիսի 22-ին, երբ Հայաստանի Ազգային Անվտանգության Խորհրդի քարտուղար էր «Օրինաց երկիր» կուսակցության նախագահ Արթուր Բաղդասարյանը, Ա.Ավոյանը Հայաստանի նախագահի հրամանագրով նշանակվել է նույն կառույցի աշխատակազմի ղեկավար՝ միաժամանակ զբաղեցնելով քարտուղարի տեղակալի պաշտոնը։

2011 թ. Հայաստանի Նախագահի հրամանագրով շնորհվել է Հայաստանի Հանրապետության քաղաքացիական հատուկ ծառայության առաջին դասի պետական խորհրդականի (գեներալ-լեյտենանտ) դասային աստիճան։

2014 թվականի ապրիլի 30-ին ազատվել է Ազգային Անվտանգության Խորհրդի աշխատակազմի ղեկավարի պաշտոնից։

2017 թվականի փետրվարին նշանակվել է Հայաստանի Ոստիկանության պետի խորհրդական, իսկ 2018 թվականին համատեղության կարգով Հայաստանի ոստիկանության պետին կից հասարակական խորհրդի նախագահի տեղակալ։

Անձնական կյանք

Ամուսնացած է, ունի դուստր և որդի։

Հայրը՝ Ռոլանդ Գրիգորի Ավոյանը (Փիլիսոփայության գիտությունների դոկտոր (1989), պրոֆեսոր. (1991) ծնվել է 1942 թ. մարտի 28-ին Խորհրդային Հայաստանի Երևան քաղաքում։ 1965 թվականին ավարտել է Երևանի պետական համալսարանը։ 1968-1992 թթ.՝ Ռոլանդ Ավոյանը դասավանդել է Երևանի պետական համալսարանում, 1992-1996 թթ.՝ եղել է Երևանի ժողովրդական տնտեսության ինստիտուտի փիլիսոփայության ամբիոնի վարիչը, իսկ 1993-1996 թթ.՝ Արցախի պետական համալսարանի փիլիսոփայության և իրավունքի ամբիոնի վարիչը։ Հեղինակել է «Իմաստնության որոնումների ճանապարհով» բուհական դասագրիրքը (2000), ինչպես նաև Երկ. Լեզվական նշանի իմացաբանական մի քանի հարցեր, Ե., 1972: Значение в языке. Философс-кий анализ, М., 1985. Մահացել է 19.12. 2000 թ., Երևան քաղաքում։

Արտաքին հղումներ

• Արտաշես Ավոյանի հարցազրույցը
• http://www.police.am/news/view/aycmartakandirqer180219.html