Արշակ Մկրտչյան
 | |
|---|---|
| Ծնվել է | 1880 |
| Ծննդավայր | Կտրած քար, Արճեշ, Վանի վիլայեթ, Օսմանյան կայսրություն |
| Մասնագիտություն | բժիշկ |
| Զավակներ | Երվանդ, Սմբատ |
Արշակ Մկրտչյան (1880, Կտրած քար, Արճեշ, Վանի վիլայեթ, Օսմանյան կայսրություն), հայ բժիշկ։
Կենսագրություն[խմբագրել | խմբագրել կոդը]
Արշակ Մկրտչյանը ծնվել է մոտ 1880 թվականին, Վանի նահանգի Արճեշի գավառակի Կտրած քար գյուղում։ Ունեցել է եղբայրներ՝ Մանուկ (եղել է Կտրած քար գյուղի ռեսը, 1915 թվականին մահացել է բնական մահով), Իսրայել, Պապեր և քույրեր՝ Քիշմիշ, Դիլբար։ Բարձրագույն բժշկական կրթություն է ստացել։ Վանի նահանգի Բերկրիի գավառակի կենտրոն Բերկրի քաղաքում բժիշկ է աշխատել։
Եղել է անվանի և բազմահմուտ բժիշկ։ Նրան հիվանդի մոտ տարել են միայն կառքով և վճարել միայն ոսկեդրամով։ Եղել է ամուսնացած և ունեցել Երվանդ (ծնված 1906) և Սմբատ (ծնված 1908) որդիներին։
1915 թվականին Մեծ Եղեռնի ժամանակ ընտանիքի անդամները միմյանց կորցրել են։
Ժառանգներ[խմբագրել | խմբագրել կոդը]
Երվանդն ու Սմբատը գաղթականների քարավանով հասել են Ալեքսանդրապոլ և այնտեղ կորցրել միմյանց։ Սմբատը տեղավորվել է Ալեքսանդրապոլի ամերիկյան որբանոցում։ Նա հետագայում ոչինչ չի իմացել եղբոր ու ծնողների ճակատագրի մասին, ուստի ենթադրել է, որ վերջիններս զոհվել են, այլապես ինչ-որ կերպ կգտնեին միմյանց։ Սմբատը Լենինականում (Ալեքսանդրապոլ) միջնակարգ կրթությունն ավարտելուց հետո Երևան է տեղափոխվել։
Բժշկի թոռները՝ Երվանդ և Սոնա Սմբատի Մկրտչյանները 2008 թվականի դրությամբ ապրել են Երևանում։
Բժշկի Դիլբար քույրը և նրա ընտանիքն ապրում են Հայաստանի Կոտայքի մարզի կենտրոն Հրազդան քաղաքի Կոճոր թաղամասում։
Աղբյուր[խմբագրել | խմբագրել կոդը]
Հարություն Մինասյան, Օսմանյան կայսրությունում և Թուրքիայի Հանրապետությունում բռնաճնշումների և ցեղասպանության ենթարկված հայ բժիշկներ, Երևան, «Լուսաբաց», 2014 — 520 էջ։
Գրականություն[խմբագրել | խմբագրել կոդը]
- Թոռների՝ Երվանդ և Սոնա Սմբատի Մկրտչյանների հայտնած տեղեկությունը, 20-12-2008 թ.։