Առաջին Հայկական Ճակատ
| Առաջին Հայկական Ճակատ | |
|---|---|
 | |
| Տիպ | ֆան շարժում |
| Հիմնադրված | 2007 թ. |
| Հիմնադիրներ | Նարեկ Հարությունյան Կարեն Շաբոյան Սերգեյ Ջանջոյան Էդգար Պետրոսյան Սամվել Մովսիսյան Տիգրան Մկրտչյան Տիգրան Բաբաջանյան |
| Ներկայացուցչություն | ք. Երևան ք. Սիսիան ք. Ստեփանակերտ ք. Վանաձոր |
| գործունեության որլորտ | սպորտ |
| Եկամուտ | ամսական անդամավճար |
| Անդամների թիվ | 700 |
| Կարգախոս | Անսպառ Հավատ, Անմնացորդ Նվիրում |
Առաջին Հայկական Ճակատ[1][2], ֆան շարժումը ստեղծվել է 2007 թվականին։ Նպատակն է ակտիվ աջակցել Հայաստանի ազգային և երիտասարդական հավաքականներին տնային և արտագնա հանդիպումների ժամանակ և նպաստել հայկական ֆուտբոլի զարգացմանը։ Կարգախոսն է «Անսպառ հավատ, անմնացորդ նվիրում»։ Ֆան ակումբն առավել հայտնի է իր անվան անգլերեն տարբերակով՝ First Armenian Front (FAF)։
FAF-ի մասին[խմբագրել | խմբագրել կոդը]
FAF-ը ստեղծվել է 2007 թվականին Armfootball[3] կայքի ֆորումի միջոցով՝ մի խումբ երիտասարդների նախաձեռնությամբ։ Որպես ձևավորված ֆան շարժում՝ ՖԱՖ-ն առաջին անգամ մարզադաշտում ներկա է գտնվել Հայաստան-Լեհաստան հանդիպմանը, որն էլ ավարտվել է Հայաստանի հավաքականի հաղթանակով։ Այդ նախաձեռնությունը աննախադեպ էր Հայաստանի նորագույն պատմության մեջ։ Քիչ ժամանակ անց կազմվեց և ընդունվեց FAF-ի կանոնադրությունը և ներքին կառուցվածքի համար անհրաժեշտ դրույթները, որից հետո սկսվեց երկրպագուների ակտիվ անդամագրություն։ Ներկայումս FAF-ի անդամ են հանդիսանում մոտ 700 անձ ինչպես Հայաստանից և Արցախից, այնպես էլ՝ արտերկրից։ Ակումբի գործունեությանը պարբերաբար անդրադառնում են հայկական ԶԼՄ-ները։ «Առաջին Ճակատի» կողմից անցկացվող միջոցառումների շարքում էլեկտրոնային, հեռուստատեսային և տպագրական լրատվամիջոցների կողմից առավելագույնս հետաքրքրություն է առաջացրել և շարունակում է մնալ այդպիսին «FAF համակրանք» մրցանակի ամենամյա շնորհումը և արտերկրում հանդես եկող հայազգի ֆուտբոլիստների հայտնաբերումն ու Հայաստանի Ազգային Հավաքականում նրանց հանդես գալուն բազմակողմանի աջակցումը։ FAF- գործունեությունն լուսաբանվել է արտասահմանյան այնպիսի լրատվամիջոցների կողմից, ինչպիսիք են ֆրանսիական TF1, թուրքական TRT 1, ռուսական Ռոսիա 1, Ռոսիա 24, իտալական rai sport հեռուստաընկերությունները։
FAF-ի նպատակները և խնդիրները[խմբագրել | խմբագրել կոդը]
Գլոբալ առումով FAF-ը, հանձին իր գաղափարախոսության, ունի հետևյալ նպատակներն ու խնդիրները[4].
- Հասարակության լայն զանգվածներին «վարժեցնել» երկրպագման ժամանակակից մշակույթին, այդ ամենը օրենքի, հասարակական կարգի և էթիկայի նորմերի սահմաններում
- Գոյություն ունեցող երկրպագուների տարբեր փոքր և միջին խմբերին միասնական մեծ կազմակերպության շուրջ հավաքագրել և հնարավորինս մեծ քանակությամբ նոր անդամներ ներգրավվել
- Բարձրացնել և առաջ տանել առողջ ապրելակերպի գաղափարը, դրանով իսկ երիտասարդներին որոշակիորեն կտրել փողոցային բարքերից, ինչպես նաև քարոզել սոցիալական ակտիվ հասարակություն
- Երիտասարդների մոտ հայրենասիրական ոգու դաստիարակումը։ Ըստ FAF-ի ներկայացուցիչների, նրանք հնարավորություն են տալիս յուրաքանչյուրին վառ կերպով արտահայտել իր էմոցիաները՝ ընդունելի և հարիր կերպով։
FAF-ը սեփական հարկի տակ հանդիպումների ժամանակ[խմբագրել | խմբագրել կոդը]
Սեփական հարկի տակ հանդիպումների ժամանակ FAF-ը՝ որպես կանոն, կազմակերպում է երթ[5][6]։ Սովորաբար երթը սկսվում է հանդիպումից 3 ժամ առաջ հետևյալ ուղղությամբ՝ Արամ Խաչատրյանի արձանին հարող տարածք- Հյուսիսային պողոտա- Հանրապետության Հրապարակ- Փավստոս Բյուզանդի փողոց- Վարդան Մամիկոնյանի արձանին հարող տարածք- Գնունի փողոց- Վազգեն Սարգսյանի անվան Հանրապետական մարզադաշտ։ Երթի ընթացքում հնչում են ոգևորիչ բացականչություններ և երկրպագուներին բնորոշ երգեր։ Մասնակիցների մոտ լինում են Հայաստանի Հանրապետության, FAF-ի և այլ խորհրդանիշներով դրոշներ, պաստառներ և բաներներ։ Բոլոր մասնակիցների հանդերձանքը առավելագույնս միանման է (Հայաստանի հավաքականի մարզաշապիկներով կամ Հայաստանը խորհրդանշող գույներով՝ կարմիր և նարնջագույն։ Որպես կանոն՝ երթի մասնակիցների թիվը անցնում է մի քանի հազարը։
Երթը, հասնելով մարզադաշտ, վեր է ածվում բուռն աջակցության հավաքականին։ FAF-ի ներկայությունն իրեն զգացնել է տալիս ողջ մարզադաշտում։ Հեռուստաընկերությունների տեսախցիկները հանդիպման ընթացքում բազմաթիվ անգամ խոշոր պլանով ցուցադրում են մարզադաշտի այն սեկցիան, որտեղ գտնվում է FAF-ը։
FAF-ը արտագնա հանդիպումների ժամանակ[խմբագրել | խմբագրել կոդը]
Մրցակցի հարկի տակ անցկացվող յուրաքանչյուր հանդիպումից առաջ FAF-ը կազմակերպում է հանդիպման կոլեկտիվ դիտում Երևանի հայտնի ակումբներից մեկում, մեծ էկրանների առջև։ Որպես կանոն՝ նմանատիպ միջոցառումներին մասնակիցների թիվը տատանվում է 300-400 անձի սահմաններում։ Տվյալ միջոցառումների ժամանակ մասնակիցների քանակը, իհարկե, ավելի քիչ է լինում, քան մարզադաշտում։ 2011 թվականից սկսած՝ հայաստանաբնակ ՖԱՖականները թմբուկներով, պաստառներով մեկնում են հավաքականի մասնակցությամբ արտագնա հանդիպմուներին։ Համախմբելով արտերկրում բնակվող հայերին՝ FAF-ի հայաստանաբնակ և արտերկրի անդամները կազմակերպված աջակցություն են ցուցաբերում հավաքականին արտասահմանյան մարզադաշտերից[7]։ Արտագնա հանդիպումից առաջ ևս FAF-ը կազմակերպում է երթ դեպի տվյալ հանդիպման մարզադաշտ, ինչպես նաև ներկա է գտնվում հավաքականի բաց մարզմանը[8] և փորձում ամեն կերպ աջակցել հավաքականին նույնիսկ մարզման ժամանակ։
FAF-ի կազմակերպած ակցիաները[խմբագրել | խմբագրել կոդը]
Նախորդ տարիներին FAF-ի կողմից կազմակերպած ակցիաներից առավել արձագանք գտան հետևյալները.
- «Հերիք է մեզ խայտառակեք»[9][10] ակցիան, որը կազմակերպվեց Հայաստան-Բոսնիա հանդիպման ժամանակ, մեծ արձագանք ստացավ։ ԶԼՄ-ների ճնշող մեծամասնությունը անդրադարձավ այս ակցիաին։
- Արտերկրում հանդես եկող հայազգի ֆուտբոլիստների հայտնաբերման գործում մեծ է FAF-ի դերը։ FAF-ի ջանքերով Մասիս Ոսկանյանը և Արազ Օզբիլիսն այսօր հանդիսանում են Հայաստանի հավաքականի անդամներ։ Ուրուգվայահայ հարձակվող Խոակին Պողոսսյանին հավաքականում հանդես գալու նպատակով FAF-ի անդամների ջանքերով ստեղծվեց տեսահոլովակ[11], որտեղ աշխարհասփյուռ հայ երիտասարդները կոչ էին անում վերջինիս միանալ իր պատմական հայրենիքի հավաքականին։ Տեսահոլովակն այնպիսի աղմուկ բարձրացրեց, որ նույնիսկ ֆրանսիական, ուրուգվայական և արգենտինական հեռուստաընկերություններն իրենց սպորտային հաղորդումների ընթացքում ցուցադրեցին այն, իսկ գրեթե բոլոր հայկական հեռուստաընկերություններն անդրադարձան այս ակցիաին։ Հետագայում ՀՖՖ նախագահն իր հարցազրույցներից մեկի ընթացքում հայտնեց, որ տեսահոլովակը մեծ ազդեցություն է թողել Խոակինի վրա և նա սկսել է լրջորեն մտածել հավաքականում հանդես գալու ուղղությամբ։
- 2011 թվականին FAF-ի կազմակերպած ամենախոշոր միջոցառումներից էր «Հրազդանը բոլորինս է» բողոքի ակցիան[12]։ Ակցիայի նպատակն էր չթողնել մարզադաշտին կից տարածքում կառուցել շինություն, որի առկայության դեպքում հնարավոր չէր լինի այլևս մարզադաշտում ֆուտբոլային հանդիպում անցկացնել։ FAF-ի ակտիվիստները հանդիպումներ ունեցան ՀՖՖ նախագահ պարոն Ռուբեն Հայրապետյանի և Երևանի քաղաքապետ պարոն Տարոն Մարգարյանի հետ։ Պայքարը մարզադաշտի համար ունեցավ շարունակական բնույթ և շատ շուտով պսակվեց հաջողությամբ։
- 2013 թվականին FAF-ը ԼՂՀ սպորտի և երիտասարդության նախարարության հետ համատեղ իրականցրեց խոշոր նախագիծ՝ Արցախում բացվեց[13] FAF-ի մասնաճյուղ։ Այսուհետ արցախաբնակ երկրպագուն կկարողանա ներկա գտնվել հավաքականի տնային հանդիպումներին, կազմակերպված աջակցություն կցուցաբերվի Արցախի Ազգային Հավաքականին, ինչպես նաև կկազմակերպվեն հավաքականի արտագնա հանդիպումների համատեղ դիտում։
- Մեծ արձագանք գտավ 2013 թ. Բուլղարիայի ընտրանու «ջերմ» ընդունելությունը[14][15] Զվարթնոց օդակայանում՝ ի պատասխան 2012 թվականին կայացած Բուլղարիա-Հայաստան[16][17] հանդիպման ժամանակ բուլղար երկրպագուների և ֆուտբոլիստների կեղտոտ և սադրիչ պահվածքի։
- FAF-ի մեկ այլ խոշոր ակցիաներից է Հայաստանում կայացած բասկետբոլի և հոկեյի միջազգային հանդիպումներում մեր թիմերին բուռն աջակցություն ցուցաբերելը։ Այդ ակցիաներին բազմիցս անդրադարձան հայկական հեռուստաընկերությունները։
FAF-ի համակրանք[խմբագրել | խմբագրել կոդը]
«FAF-ի համակրանք»-ը ամենամյա հատուկ մրցանակ է, որը շնորհվում է Հայաստանի ազգային հավաքականի այն ֆուտբոլիստին, ով կարողացել է առավելագույնս դրսևորել իրեն թե՜ ազգային հավաքականում, թե՜ իր ակումբում, ինչպես նաև աչքի է ընկել իր օրինակելի պահվածքով ինչպես խաղադաշտում, այնպես էլ խաղադաշտի սահմաններից դուրս։ «FAF-ի համակրանք»-ը գործում է 2009 թվականից, և առաջին մրցանակակիրն է Հենրիխ Մխիթարյանը։ 2010 թվականին «Օպերայի և բալետի պետական թատրոնի» շենքում կայացած, ՀՖՖ-ի կողմից կազմակերպված ֆուտբոլային մրցաշրջանի ավարտական տոնական համերգի ընթացքում մրցանակը հանձնվեց Հայաստանի հավաքականի 14 համարին՝Յուրա Մովսիսյանին։ 2011 թվականին «Հարսնաքար» համալիրում ՀՖՖ-ի կողմից կազմակերպված ամանորյա, տարեվերջյան տոնահանդեսի ժամանակ մրցանակը հանձնվեց[18][19] հավաքականի բազմափորձ դարպասապահին՝Ռոման Բերեզովսկուն։2012 թվականին մրցանակը հանձնվեց[20] Լևոն Հայրապետյանին, իսկ 2013 թվականին հանձնվեց[21][22] Արազ Օզբիլիսին՝ Ռուսաստան-Հայաստան խաղի նախօրեին, Կրասնոդար քաղաքի օդանավակայանում։
Անցկացման կարգը[խմբագրել | խմբագրել կոդը]
Ամեն տարվա դեկտեմբերին FAF-ի անդամների շրջանակում անցկացվում է քվեարկություն։ Քվեարկության արդյունքում ամենաշատ ձայն ստացած ֆուտբոլիստին էլ տրվում է մրցանակը։
Ծանոթագրություններ[խմբագրել | խմբագրել կոդը]
- ↑ FAF-ի մասին
- ↑ «Интервью с представителем First Armenian Front». Արխիվացված է օրիգինալից 2012 թ․ ապրիլի 15-ին. Վերցված է 2014 թ․ օգոստոսի 27-ին.
- ↑ «armfootball.com». Արխիվացված է օրիգինալից 2011 թ․ նոյեմբերի 9-ին. Վերցված է 2020 թ․ դեկտեմբերի 31-ին.
- ↑ «FAF-ի կանոնադրությունը». Արխիվացված է օրիգինալից 2014 թ․ սեպտեմբերի 18-ին. Վերցված է 2014 թ․ օգոստոսի 30-ին.
- ↑ FAF-ի երթը Հայաստան-Դանիա հանդիպումից առաջ 10.09.2013
- ↑ Երթ Հայաստան-Բելառուս խաղից առաջ 15.08.2012
- ↑ «Հայ երկրպագուները սպասում են ազգային հավաքականին». Արխիվացված է օրիգինալից 2016 թ․ մարտի 4-ին. Վերցված է 2014 թ․ օգոստոսի 27-ին.
- ↑ FAF-ի անդամները Պրահայում` հավաքականի մարզման ժամանակ
- ↑ «ՀԵՐԻՔ Է ՄԵԶ ԽԱՅՏԱՌԱԿԵՔ»(չաշխատող հղում)
- ↑ «Հերիք է մեզ խայտառակեք»ակցիային նվիրված տեսահոլովակը
- ↑ FAF-ի պատրաստած տեսահոլովակը` նվիրված Խոակինին
- ↑ «Տեսանկյուն»հաղորդման անդրադարձը ակցիային
- ↑ FAF-ը մասնաճյուղ հիմնադրեց Արցախում
- ↑ «Ջերմ ընդունելություն»Բուլղարիայի ընտրանուն(չաշխատող հղում)
- ↑ Հայ ֆանատներն ագրեսիվ դիմավորեցին Բուլղարիայի հավաքականին (ֆոտո)
- ↑ Բուլղարիա-Հայաստան 1-0
- ↑ Բուլղարիա - Հայաստան՝ 1:0
- ↑ Հայաստանի հավաքականի մեծարման երեկոն և «FAF համակրանք» մրցանակի հանձնումը Ռոման Բերեզովսկուն
- ↑ Ռոման Բերեզովսկի. Մեծարման երեկոն երկար կհիշեմ(չաշխատող հղում)
- ↑ «Լևոն Հայրապետյանը ստացավ «FAF համակրանք»մրցանակը». Արխիվացված է օրիգինալից 2016 թ․ մարտի 5-ին. Վերցված է 2014 թ․ օգոստոսի 27-ին.
- ↑ tert.am(չաշխատող հղում)
- ↑ «FAF անդամները Արազին հանձնեցին մրցանակը». Արխիվացված է օրիգինալից 2016 թ․ մարտի 4-ին. Վերցված է 2014 թ․ օգոստոսի 27-ին.