Այգեզարդ

Վիքիպեդիայից՝ ազատ հանրագիտարանից

Այգեզարդ, գյուղ Հայաստանի Հանրապետության Արարատի մարզի Արտաշատի տարածաշրջանում, Արտաշատ քաղաքից ընկած է 3-4 կմ արևելք։ Մարզկենտրոնից գտնվում է 6.5 կմ հեռավորության վրա։

Պատմություն[խմբագրել]

Նախկինում ունեցել է Անաստասավան, Դարղալը, Դարիդաղի, Դարղալու Վերին, Թազա Դարղալու անվանումները։ Գյուղը հիմնադրվել է մինչ հայրենական պատերազմը, գտնվել է Շահումյան (Յուվա) գյուղից ներքև դեպի Արաքսի ափ, որտեղ մինչև վերջերս պահպանվել էին մի քանի ավերակներ, իսկ գյուղի եկեղեցու ավերակների տեղում մի քանի հավատացյալներ 1970-ականներին մատուռ կառուցեցին։ Պատերազմի սկզբին գյուղը տեղահանվել է, մոտակայքում կառուցվել են պաշտպանական կառույցներ, փորվել են խրամատներ, իսկ տներում ապրել են զինվորներ։ Պատերազմից հետո գյուղը միացնում են Մասումլու հարևան գյուղին և վերանվանում Անաստասավան, ի պատիվ Անաստաս Միկոյանի, իսկ Ստալինի մահից հետո 1956թ. նորից բաժանում և վերանվանում արդեն Այգեզարդ։

Բնակչություն[խմբագրել]

1831 թ-ին ունեցել է 353, 1873թ-ին՝ 789, 1908 թ-ին՝ 1277, 1979 թ-ին՝ 2894 հայ բնակիչ։ Ըստ 2005 թ-ի ազգային վիճակագրական ծառայության տվյալների համայնքի բնակչությունը կազմում է 3329 մարդ, որից 48% տղամարդիկ են, իսկ կանայք՝ 52%։ Մինչաշխատունակ տարիքի բնակչությունը կազմում է 23%, աշխատունակ տարիքի ներկայացուցիչները՝ 63%, հետաշխատունակները՝ 14%։ Գյուղն ունի 926 տնտեսություն։ Ունի դպրոց, մշակույթի տուն, գրադարան, ծննդատուն, մանկապարտեզ։ Համայնքի տնտեսության մասնագիտացման ճյուղը գյուղատնտեսությունն է, համախառն բերքի մեծ մասը տալիս է բուսաբուծությունը։