Ադամ Լևին

Վիքիպեդիայից՝ ազատ հանրագիտարանից
Picto infobox music.png
Ադամ Լևին
Adam Levine

Ադամ Լևինը 2011 թվականին
Հիմնական տվյալներ
Ի ծնե անուն Ադամ Նոա Լևին
Ծնվել է մարտի 18, 1979 (1979-03-18) (35 տարեկան)
Լոս Անջելես, Կալիֆորնիա, Ամերիկայի Միացյալ Նահանգներ ԱՄՆ
Ժանրեր Փոփ ռոք
Մասնագիտություն Երգիչ-երգահան, մուլտի ինստրումենտալիստ, դերասան
Գործիքներ Վոկալ, կիթառ, դաշնամուր, հարվածային գործիքներ, բաս կիթառ
Գործունեություն 1994-ներկա
Լեյբլ J Records, A&M Octone Records, Interscope Records
Կապված Maroon 5
Կայք www.maroon5.com

Ադամ Նոա Լևին (անգլ.՝ Adam Noah Levine, ծնվ. 1979թ. մարտի 18, Լոս Անջելես, Կալիֆորնիա), ամերիկացի երգիչ-երգահան, մուլտի ինստրումենտալիստ և դերասան։ Հանդիսանում է Maroon 5 փոփ ռոք խմբի գլխավոր վոկալիստը։

Իր պատանեկության տարիներին Ադամը հիմնադրել է Kara's Flowers ալտերնատիվ ռոք խումբը և եղել է այդ խմբի մենակատարն ու կիթառահարը։ Խումբը իր առաջին ալբոմի թողարկումից հետո, առևտրային անհաջողությունների պատճառով այլևս չի շարունակում իր գործունեությունը։ Հետագայում խմբի անդամներին միանում է ևս մեկը և ձևավորվում է Maroon 5 խումբը, որը ունենում է զգալի հաջողություններ։ Մինչև այժմ Maroon 5-ը թողարկել է 5 ստուդիական ալբոմ, ստացել է երեք Գրեմմի, երկուական BMA և AMA, և մեկական MTV VMA և WMA։

2011 թվականից սկսած Ադամը եղել է NBC հեռուստաընկերության տաղանդներ փնտրող The Voice հեռուստանախագծի մարզիչ։ 2012 թվականին նա հանդես է եկել «Ամերիկյան սարսափ պատմություն» հեռուստասերիալի երկրորդ եթերաշրջանում։, իսկ ավելի ուշ նաև ստանում է «Սկսել կրկին» ֆիլմի գլխավոր դերերից մեկը։

Ադամը նաև ձեռնարկատեր է։ 2013 թվականից սկսած նա ունի օծանելիքի իր սեփական գիծը։ Նույն տարում նա նաև համագործակցել է Kmart և ShopYourWay.com-ի հետ, որպեսզի մշակի հագուստի և աքսեսուարների իր հավաքածուն։ Ադամը նաև ունի իր ձայնագրման լեյբլը, որը անվանված է 222 Records։

Վաղ կյանք[խմբագրել]

Ադամ Նոա Լևինը ծնվել է Լոս Անջելեսում Ֆրեդ Լևինի և Պետսի Նոայի ընտանիքում։ Նա ունի մեկ կրտսեր եղբայր՝ Մայքլը, և մեկ խորթ եղբայր՝ Սեմը։ Ադամի ծնողները ամուսնալուծվել են երբ նա եղել է 7 տարեկան։ Ծնողների ամուսնալուծությունից հետո նա ապրել է մոր հետ, իսկ հանգստյան օրերին՝ հոր հետ։ Նա անցել է թերապիա ծնողների ամուսնալուծության պատճառով, սակայն նա դա անվանել է «ժամանակի անիմաստ կորուստ»։

Ադամը հաճախել է Բրենտվուդ դպրոց որտեղ էլ հանդիպել է իր ապագա խմբի անդամներ՝ Ջեսսի Կարմայքլին և Միկկի Մեդենին։ Նա նաև հաճախել է French Woods փառատոնի կատարողական արվեստի ճամբար, որը գտնվում է Հենկոկում, Նյու Յորք։

«Q» ամսագրին տված հարցազրույցում Ադամը պատմել է որ վաղ տարիքում նա փորձել է թմրանյութեր։ «Ես օգտագործել եմ թմրանյութեր: Ես ծխել եմ մի ամբողջ զամբյուղ երբ երիտասարդ էի»։ Սակայն նույն հարցազրույցում նա ասել է որ դրանք ուղակի աղբ են և ոչ մի լավ բան չեն բերում աշխարհին։

Ադամը իրեն համարում է հրեա, քանի որ նրա հայրը ազգությամբ հրեա է։ Նրա մայրական պապը նույնպես եղել է հրեա։

Kara's Flowers[խմբագրել]

1995 թվականի սեպտեմբերին Ադամը իր համադասարանցիներ՝ Ջերի Կարմայքլի, Միկի Մեդենի և Ռայան Դասիկի հետ հիմնադրում է Kara's Flowers խումբը, որը սկզբնական շրջանում համերգներ է տալիս ակումբներում։ 1997 թվականին խումբը կնքելով պայմանագիր Reprise Records-ի հետ խումբը թողարկում է իր «The Fourth World» ալբոմը։ Ունենալով ընդամենը 5000 օրինակի վաճառք, լեյբլը դադարեցնում է խմբի հետ իր աշխատանքը և խումբը չի շարունակում իր գործունեությունը։

Maroon 5[խմբագրել]

    1rightarrow.png Հիմնական հոդված՝ Maroon 5

Kara's Flowers խմբի գործունեության դադարից հետո Ադամը և Ջերի Կարմայքլը որոշում են լքել Լոս Անջելեսը և հետագա ուսումը շարունակել Նյու Յորքում։ Այնտեղ սովորելով Five Towns քոլեջում Ադամը որոշակի ժամանակ նաև աշխատում է մատուցող Johnny Rockets ռեստորանում։ Որոշակի ժամանակ հետո քոլեջից դուրս գալով և իրենց ուսումը կիսատ թողնելով նրանք որոշում են վերամիավորվել Միկկի Մեդենի և Ռայան Դուսիկ հետ և ևս մեկ անգամ ձևավորել խումբ։ Սկզբում նրանք փորձում են մի քանի ժանրերում այդ թվում քանթրի և ֆոլկ, սակայն մինչև վերջնական ժանրի ընտրություն կայացնելը Octone Records ձայնագրման ստուդիայի աշխատակից Բեն Բերկմանի խորհրդով խմբի հինգերորդ անդամ է դառնում Ջեյմս Վալենտինը և խումբը վերանվանվում է Maroon 5։

Ադամը Maroon 5-ի հետ 2007 թվականի համերգներից մեկում

2002 թվականի հունիսին խումբը թողարկում է իր դեբյուտային ալբոմը որը կոչվում է «Songs About Jane»։ Ալբոմը վաճառվում է ավելի քան 10 միլիոն օրինակով և ստանում է պլատինե սերտիֆիկատ մի քանի երկրներում։ 2004 թվականին ալբոմը դառնում է տասներորդ լավագույն ամենաշատ վաճառված ալբոմը՝ թողարկումից 2 տարի հետո։ Այս ընթացքում խումբը մեկնում է մի շարք շրջագայություններ և ունենում է համերգներ տասնյոթ երկրներում։ 2005 թվականին խումբը ստանում է Գրեմմի մրցանակաբաշխության «Լավագույն նոր արտիստ» մրցանակը, իսկ հաջորդ տարի ստանում է Գրեմմի «Լավագույն փոփ երգ դուետի կամ խմբի կողմից» անվանակարգում իր «This Love» երգի համար։

2006 թվականից խումբը սկսում է ձայնագրել իր նոր ալբոմը որը կոչվում է «It Won't Be Soon Before Long»։ Ալբոմը թողարկվում է 2007 թվականի մայիսին և առաջին շաբաթում ունենում է 430,000 օրինակի վաճառք։ Ալբոմի վաճառքին նպաստելու համար խումբը շրջագայություններ է ունենում Բոստոնի, Սան Ֆրանցիսկոյի, Մինեապոլիսի, Մայամիի և Նյու Յորքի փոքր համերգասրահներում։

Շրջագայություններից հետո 2009 թվականին խումբը սկսում է համագործակցել պրոդյուսեր և երգահան Ռոբերտ Ջոն Լանգի հետ և ձայնագրվում է Շվեյցարիայում։ 2010 թվականի օգոստոսին խումբը թողարկում է իր «Hands All Over» ալբոմը, որի առաջին 3 սինգլների հաջողությունից հետո խումբը թողարկում է իր «Moves Like Jagger» երգը որը Լևինը նկարագրել է որպես «մեկը մի քանի երգերից, որը իսկապես ռիսկ էր»։ Չնայած դրան երգը բավականին մեծ հաջողություն է ունենում և դառնում է 2011 թվականի 9-րդ ամենաշատ վաճառված սինգլը, իսկ հաջորդ տարի բոլոր ժամանակների ամենաշատ վաճառված սինգլների ցանկում զբաղեցնում է ութերորդ հորիզոնականը։

2012 թվականի հունիսին խումբը թողարկում է իր չորրորդ ալբոմը որը կոչվում է «Overexposed»։ Ալբոմի գլխավոր սինգլը «Payphone» երգն է որը իր թողարկման առաջին շաբաթում ունենում է 493,000 օրինակի վաճառք։ Ալբոմի վաճառքին նպաստելու համար խումբը 2012 թվականի օգոստոսից մեկնում է համաշխարհային շրջագայությունների։

Խմբի հինգերորդ ստուդիական ալբոմը, որը կոչվում է «V», թողարկվել է 2014 թվականի օգոստոսին։ Այն Billboard 200 ալբոմների հիթ շքերթում զբաղեցրել է առաջին հորիզոնականը։

Այլ նախագծեր[խմբագրել]

Երաժշտական համագործակցություններ[խմբագրել]

Ադամը համագործակցել է մի շարք տարբեր երաժիշտների հետ։ 2005 թվականին Ying Yang Twins հիփ հոփ դուետի հետ թողարկել է «Live Again» երգը։ Համագործակցությամբ հայտնի ռեփեր Քանյե Ուեսթի հետ թողարկել է «Heard 'Em Say» երգը։ Նա նաև կատարել է Ալիշա Քիզի «Alicia Keys» կոչվող երրորդ ստուդիական ալբոմի «Wild Horses» երգը երգչուհու հետ։ 2007 թվականին բրիտանացի երգչուհի Նատաշա Բեդինգֆիլդը նրա հետ համատեղ թողարկել է իր «Say It Again» երգը։ Ադամի հաջորդ համագործակցությունը եղել է «Bang Bang» երգը՝ կանադացի ռեփեր K'naan-ի հետ համագործակցությամբ։ 2009 թվականին ռոք երաժիշտ Սլեշի հետ ձայնագրել է «Gotten» երգը որը թողարկվում է հաջորդ տարվա ապրիլին։ 2010 թվականին Լևինը եղել է այն 80 երաժիշտներից մեկը ովքեր կատարել են «We Are the World» երգի ռիմեյք տարբերակը որը գրվել է բարեգործական նպատակների համար։ 2011 թվականին Gym Class Heroes-ի հետ թողարկել է «Stereo Hearts» երգը։ 2012 թվականին ռեփերներ 50 Սենտի և Էմինեմի հետ համագործակցությամբ թողարկել է «My Life» երգը։ Ադամը հանդես է եկել նաև որպես սոլո կատարող իր խմբի «She Will Be Loved» երգում։

Հեռուստատեսություն և մամուլ[խմբագրել]

Ադամը իր խմբի անդամ Ջեսսի Կարմայքլի հետ 2007 թվականին

Ադամը սկսած 2011 թվականի ապրիլից հանդես է գալիս որպես մարզիչ NBC հեռուստաընկերության The Voice հեռուստանախագծում։ Առաջին եթերաշրջանի հաղթող մասնակիցը եղել է նրա թիմից։ Մինչև այժմ միայն նա և Բլեք Շելթոնն են մասնակցել հեռուստանախագծի բոլոր եթերաշրջաններին։

2012 թվականին Ադամը նկարահանվել է «Ամերիկյան սարսափ պատմություն» հեռուստասերիալի երկրորդ եթերաշրջանի 5 էպիզոդներում։ Նույն տարում նա նաև նկարահանվեց ռեժիսոր Ջոն Կարնիի «Սկսել կրկին» երաժշտական-դրամատիկ ֆիլմում։

2013 թվականի նոյեմբերին «People» ամսագիրը նրան անվանեց «Տարվա ամենասեքսուալ տղամարդը»։ Մինչ այդ նա նաև հայտնվել էր նույն ամսագրի «Միայնակ սեքսուալ տղամարդկանց» ցանկում։ Glamour ամսագրի «2012-ի ամենասեքսուալ տղամարդը» ցանկում նա զբաղեցրել է 41-րդ հորիզոնականը։ 2011 թվականի փետրվարին նա նաև նկարահանվել է բրիտանական Cosmopolitan ամսագրի քաղցկեղի իրազեկմանը նվիրված մերկ ֆոտոշարքում։

Բիզնես[խմբագրել]

2008 թվականի հոկտեմբերին First Act ընկերության հետ Ադամը թողարկեց իր կիթառների հավաքածուն։ Կիթառների վաճառքը հասանելի էր միայն Target խանութների ցանցում։

Ըստ The Hollywood Reporter լրատվական ընկերության հրապարակած տվյալների Ադամը 2013 թվականի ընթացքում վաստակել է ավելի քան 30 միլիոն դոլլար, որի 10-12 միլիոնը նա վաստակել է The Voice նախագծի շրջանակներում։

2010 թվականի օգոստոսին Լաս Վեգասում Ադամը հիմնադրում է իր 222 կոչվող նորաձևության բրենդը։ Հավաքածուն կազված է ջինսերի, շապիկների և կաշվե բաճկոնների տեսականիներից, որը նա բնութագրում է որպես՝ «պարզ, մաքուր և ամուր»։

2012 թվականի փետրվարին Ադամը հիմնադրում է իր սեփական ձայնագրման ստուդիան, որը կոչվում է 222 Records։ Ստուդիայում հետագայում ձայնագրվել են՝ Մեթյու Մորիսոնը, Դիեգո Բոնետան և այլք։

2013 թվականին Ադամը համագործակցել է ID ընկերության հետ՝ ստեղծելու իր դեբյուտային օծանելիքի գիծը։ Օծանելիքի հավաքածույի տեսականին որը նախատեսված է կանանց և տղամարդկանց համար, ներկայացվում է նույն թվականի փետրվարին Լոս Անջելեսում։ 2013-ին Ադամը նաև համագործակցում է Kmart ընկերության և ShopYourWay.com-ի հետ՝ հիմնադրելու ADAM Levine կոչվող տղամարդկանց համար նախատեսված հագուստի և աքսեսուարների բրենդը։ Հավաքածույի վաճառքը մեկնարկում է նույն տարվա հոկտեմբերի 1-ից Kmart ընկերության բոլոր խանութների ցանցերում և օնլայն տարբերակով։

Կատարողական արվեստ[խմբագրել]

Ադամը հետաքրքրությունը երաժշտության նկատմամբ սկսվել է 10 տարեկանից, երբ նա սկսում է կիթառ նվագել սովորել։ Իր մանկության տարիներին նա ոգեշնչվել է այնպիսի խմբերի երաժշտությամբ, ինչպիսիք են՝ The Beatles, Nirvana, Fleetwood Mac, The Who, Pearl Jam, Soundgarden և Alice in Chains, իսկ ավագ դպրոցում՝ Բոբ Մառլի, Մայքլ Ջեքսոն, Բիլ Ուեզերս, Էլ Գրին, Սթիվի Ուանդեր և Մարվին Գեյ[1][2]։

Անձնական կյանք[խմբագրել]

2010 թվականի սեպտեմբերին The Howard Stern Show ռադիո ծրագրին տված հարցազրույցում Ադամը ասել է որ հանդիպում է Victoria's Secret-ի մոդել Աննա Վյալիցինայի հետ։ Նրանք ծանոթացել են 2010 թվականին Maroon 5-ի ելույթներից մեկի ժամանակ Լաս Վեգասում։ 2012 թվականի ապրիլին զույգը հայտարարեց որ նրանք բաժանվել են։

2012 թվականի մայիսից Ադամը սկսեց հանդիպել Victoria's Secret-ի մոդել Բեհատի Փրինսլուի հետ։ Նրանք 2013-ի մարտին բաժանվում են, սակայն նույն տարվա հուլիսից կրկին շարունակում են հանդիպել։ 2014 թվականի հուլիսին 19-ին Մեքսիկայում կայանում է նրանց ամուսնական արարողությունը։

Ադամը բավականին ժամանակ է արդեն զբաղվում է յոգայով, ինչը նրան օգնում է «ֆիզիկապես հանգստանալ»։

Սկավառակագրություն[խմբագրել]

Հիմնական հոդված` Maroon 5-ի սկավառակագրություն

Սինգլներ[խմբագրել]

Սինգլներ, որոնցում Ադամ Լևինը ունեցել է իր մասնակցությունը որպես անհատ կատարող
Անվանում Տարի Ալբոմ
«Heard 'Em Say»
(Քանյե Ուեսթի սինգլը համագործակցությամբ Ադամ Լևինի հետ)
2005 «Late Registration»
«Say It Again»
(Նատաշա Բեդինգֆիլդի սինգլը համագործակցությամբ Ադամ Լևինի հետ)
2007 «N.B.» և «Pocketful of Sunshine»
«Bang Bang»
(K'naan-ի սինգլը համագործակցությամբ Ադամ Լևինի հետ)
2008 «Troubadour»
«Stereo Hearts»
(Gym Class Heroes-ի սինգլը համագործակցությամբ Ադամ Լևինի հետ)
2011 «The Papercut Chronicles II»
«Man in the Mirror»
(Ադամ Լևինի և Խավիեր Քոլոնի սինգլը)
Ոչ-ալբոմային սինգլ
«Yesterday»
(Ադամ Լևինի և Թոնի Լուկայի սինգլը)
2012
«My Life»
(50 Սենտի սինգլը համագործակցությամբ Ադամ Լևինի և Էմինեմի հետ)
«Street King Immortal»
«YOLO»
(The Lonely Island-ի սինգլը համագործակցությամբ Ադամ Լևինի և Քենդրիկ Լամարի հետ)
2013 «The Wack Album»

Ֆիլմագրություն[խմբագրել]

Հեռուստասերիալներ
Տարի Անվանում Դեր Նշումներ
1997 «Բևերլի Հիլզ, 90210» ինքը 1 էպիզոդ
2009 «30 Ռոք» ինքը 1 էպիզոդ
2012 «Ամերիկյան սարսափ պատմություն։ Ապաստարան» Լեո Մորիսոն 5 էպիզոդ
2013 «Գրիֆինների ընտանիքը» ինքը (հնչյունավորում) 1 էպիզոդ
Ֆիլմեր
Տարի Անվանում Դեր Նշումներ
2013 «Սկսել կրկին» Դեյվ Քոլ

Ծանոթագրություններ[խմբագրել]

Արտաքին հղումներ[խմբագրել]